کلام بابا فرید رحمت اللہ علیہ

جِت دہاڑے دھن وری ساہے لئے لکھاءِ
مَلَک جے کنّی سُنیندا مُونھ دَکھالے آءِ
جَند نِمانی کّڈھیے ہڈّاں کُوں کڑکا ءِ
ساہے لِکھے ، نہ چلّنی، جِندُو کُوں سمجھاءِ
جِند ووہٹی، مرن وَر ، لَے جاسی پرنا ءِ
آپن ہتھی جول کے کَیں گل لگے دھا ءِ
والوں نِکّی پُرسلات کنِّیں نہ سُنی آءِ
فریدا کِڑی پَوَندی اِی ، کھڑا نہ آپ مُہاءِ

اوکھے لفظاں دے معنے

جِت : جیس ۔ جیویں۔ جیس ول
دہاڑے:روز۔ دن
دَھن :عورت۔ بیوی
وری:بیاہی گئی۔ وہیائی گئی۔
ساہے: ویاہ دی متھی ہوئی تاریخ
مَلک : موت دا فرشتہ۔ عِزرائیل
کنّی: کّناں توں۔
جِند :جاں۔ حیاتی
نمانی: بے چاری، عاجز۔ مسکین۔
ہڈاں :ہڈّیوں۔
کڑکاءِ: توڑ کے۔
چلّنی : چل سکدی۔ ٹل سکدی۔
کُول: کو۔
مَرن: موت
وَر: دولہا۔ خاوند۔
پرناءِ: وہیاہ کے ۔ شادی کرکے
آپن: اپنے
جول کے : ٹور کے۔ چھڈ کے آکے
کیں : کِس کے