زندگی بھی کیا خوب ہم سفر ہے۔ ہر موڑ پر اپنی مرضی کرتی ہے۔ انسان کسی اور طرف جانا چاہتا ہے مقدر کے ایسے بھنور اس کی راہ میں بچھاتی ہے کہ وہ یہ تک بھول جاتا ہے کہ وہ کس طرف جانا چاہتا تھا، کدھر آ نکلا اور کدھر جا رہا ہے۔ بس چلتا چلا جا رہا ہے۔ سفر مقدر ہے یا مقدر ایک سفر ہے۔ میں نہ سمجھ پایا۔ شاید یہ بات سمجھنے یا سمجھانے کی ہے بھی نہیں۔ بس گزارنے کی ہے۔ کسی نے کہا تھا۔ "ہم بھی کیا یاد کریں گے کہ خدا رکھتے تھے" میں یہی بات زندگی کے بارے میں کہوں گا۔

اگر زندگی خوبصورتی کا نام ہے
تو اسے تہماری مسکان سے تعبیر کرتا ہوں

اگر زندگی خوشی کا نام ہے
تو تمہارے ساتھ سے زیادہ کیا خوشی ہو گی

اگر زندگی راز ہے
تو وہ راز تمہاری صورت میں جھ پر عیاں ہوا

اگر زندگی کو غم کہا جائے
تو تمہارا ہجر اس غم کی مجسم تشریح ہے

اگر زندگی ایک حقیقت ہے
تو تم روز روشن کی طرح عیاں ہو

اگر زندگی ایک خواب ہے
تو میرے سپنے تمہاری یادوں سے معطر ہیں

اگر زندگی کاروبار ہے
تو تم گارگہَ ہستی کی کل کمائی ہو

اگر زندگی ایک سفر ہے
تو تمہارے ہاتھوں کا لمس مجھے اس سفر پہ رواں دواں رکھے ہوئے ہے